AzQAC-ın prezidenti Novruz Aslanov ilə Türk Kızıl Ayının prezidenti professor Fatma Meriç Yılmaz arasında görüş keçirilib

22 oktyabr 2023-cü il tarixdə Türk Kızıl Ayının prezidenti professor Fatma Meriç Yılmazın rəhbərlik etdiyi nümayəndə heyəti Azərbaycana səfərə gəlib.

Oktyabrın 23-də AzQAC-ın baş ofisində Azərbaycan Qızıl Aypara Cəmiyyətinin(AzQAC) prezidenti,millət vəkili  Novruz Aslanov ilə Türk Kızıl Ayının prezidenti professor Fatma Meriç Yılmaz arasında görüş keçirilib.

Görüşü giriş sözü ilə açan Novruz Aslanov qonaqları AzQAC-ın kollektivi, çoxsaylı  könüllüləri və üzvləri adından salamlayıb və onları Azərbaycanda görməkdən məmnun olduğunu bildirib. Görüşdə iki təşkilat arasında görülən ümumi işlər, qarşılıqlı əməkdaşlıq çərçivəsində həyata keçirilən layihələr və gələcək perspektivlər barədə müzakirələr aparılıb.Ötən illərdə olduğu kimi bu il də əməkdaşlıq çərçivəsində həm AzQAC, həm də Türk Kızıl Ayının qarşıya qoyulan məqsədə çatmaq üçün üzərilərinə düşən öhdəliklərin zamanında və yüksək səviyyədə yerinə yetirilməsinin önəmi vurğulanıb. Azərbaycan Qızıl Aypara Cəmiyyətinin prezidenti Novruz Aslanov  İkinci Qarabağ müharibəsi  zamanı Türk Kızılayının göstərdiyi yardımlara diqqət çəkib və bu dəstəyə görə öz təşəkkürünü bildirib.

Xanım Fatma Meriç Yilmaz öz növbəsində səmimi qarşılanmaya görə minnətdarlığını bildirərək, mövcud əlaqələrin gələcəkdə daha da inkişaf etdirilməsinin vacibliyini vurğulayıb. Həmçinin, Türkiyə və Azərbaycanın hər zaman bir-birinin yanında olduğunu bildirib. Zəruri layihələr və əməkdaşlığın istiqamətləri barəsində fikir mübadiləsi aparılıb. Bu ilin  fevral ayının 6-da Kahramanmaraş şəhərində baş vermiş zəlzələlərdən sonra Azərbaycan Qızıl Aypara Cəmiyyətinin böyük yardım kampaniyasını xatırladan Fatma Yılmaz, "AzQAC bu xeyirxah aksiyası ilə  bir daha bizim tərəfimizdə olduğunu hiss etdirdi" söyləyərək təşəkkürünü bildirib.
Sonda qonaqlara hədiyyələr təqdim olunub, xatirə fotoları çəkilib.

Görüşdən sonra AzQAC-ın rəhbər heyəti ilə qonaqlar birgə Fəxri Xiyabanda Ulu Öndər Heydər Əliyevin məzarını və Şəhidlər Xiyabanını ziyarət ediblər.